Waruguru Kiai

Nī ūndū wa maūndū ma wendo

Nīdahoya Wendo
wendo urīa wa ma
ti ūyū wa tūwama
tūmaheni tūgemie
na gathūngu ka nairobi
nī anake a rūrīrī
aya maregire kūrīma
wīra wao – kūhūra shati bathi gūgatuka
makīnyūaga tucai tūtahoraga
makiūragaga ciana cia rūrīrī na tūmībuto tūnyitu!

ona ngihoyaga wendo
ndahoya ndikendwo nī aya!

ūkūma kū?
wendo ūrīa wa true
na ti ūyū wa ūtukū
ūyū andū macemaga hwaīini waīgira
marīagūo ni rūamba mabebeīni makiabūrana
magithadūranaga, makirīana, makihihana, makihumania, makiugithanagia mbū…
ūri haraya ndūgimenya mūhaicwo na muhaicani.

wendo nī mwega
No reke nemwo nī ūyū wa kirīmu giki
giki kinanagia ‘my honey, kindū wa mine’
mūgūri wa nyama na guarana njoorūa
rīrīa ciana na mūka maroragwo ni ng´aragu
giki kirīmū kijiragira mugūnda kieni
kiaba kūaramia ūyū wakwa
gitigite acre yakio nyūmba
mūthuri mūgima uinagia mwarī wake Amarula na bend over
enyuīte kigoti kia leather
mūgutho wa red, ehenagie nī swag
kiubani handu hothe kiona karima
arokua!

Ndiregete wendo
no wa kirīmu giki afana!

Nīdahoya marirū ma wendo
ūria wa true
ti ūyū wa sausage
ti ūyū wa miromo ya thakame
na ndūara ta cia mūrogi
ti ūyū wa mikanye
na nyondo njore ta ibuku
ti ūyū wa mercedez na
mīkawa mīnene mīnene
ti ūyū wa mbarī ya itoga cia gicagi

Ndiregete Motoka, ona Nyumba kirorerwa ndigitūma ndithūe
no wendo ti ido, utonga ni kirūrū!
wendo ti rīītwa, gutirī rīītwa ritakuragia mwana!
kana mbarī na ikeno cia mūcukani
wendo ndiregete
no ūyū wa mwīgano reke ūreme!

kwendwo nī kwega
people ya mūndū nī irī bata
wendetwo nī ayorokaga
agathera ona akerūha
agakinyūkia ta kanyau ka butchery
akaiba ta idathi rīa mūkawa
kamwītio ka weņdo nikari rūgari
itina nīrīnenehaga gukira rīrīa ringi, ma!

Ndīna ihoya rīa wendo
no reke ndigane na wendo ūyū wa mabebe
mūrīrībuko wa dagika īmwe tu
ndikuona gihota.

Rīrirīa riakwa
nī kamwana kairū gathaka
kagirī na njarūmi dakena.

mwanake ūinagira ūthaka wakwa rūīmbo
kenya handu hothe yarūma!
mwanake wonaga muciī wake maithoīni makwa
mwanake wonaga rīūa akaririkana gūtheka gūakwa
gūkenga kwa makai makwa
na hinya wa ciero ciakwa.

Mwanake mwīthī
mwīrūtirī wīra na kīyo mūthenya na ūtukū
mwanake ūrī ngumo ta ya kibe
urīa wa kamwaki ka mūra
karīa gatahora utaīgite
ndūre ndīaga mahiga ma ‘mjengo’
nī gūkua ciana ciake mwaka o mwaka.

Mwanake ūmeyaga rūcurī kwa ‘irida’ rīakwa peke yake!
mwanake ūrīyumaga thutha akurumite
ndakinyūkia cabbage carrot cabbage carrot
anyede rīu ndina figure 8
na rūcio ayone ndi 18.

Tondū nidahoya kwendwo
reke nyendwo nī ta ūyū ma!

 

Comments

comments



There are 4 comments

Add yours
  1. Muru wa Wangechi

    Kai nama kirimu githekagia itimu ii
    Ati weririria kii mwana witu ti itheru
    Gikuyu oigire winyitiire arugite wikonotete
    Ningi kwirirwo ndakwira Waruguru ti kuneo

    Riu kai utaiguite ati waathi wakura wongagirirwo kabisi nawe
    Muthungu ari gukura ariaga tucau
    Ni magego gukuuka na kuinaina

    Ngwaci itari mung’uru ndingiaga murii
    Gikuyu oigire arume mathuire kuona ndirurie
    Maitho mau undoraga namo wee ri
    Na ngeithi nyingi cia gicaci kai unduaga
    Kirimu.

    Mundu muugi ndari miheere ya uhoro
    Mwari wa Kiai, ndekia thakame iceere
    Gutiri ng’eenda thi itari mutegi
    Wanduria giturenge ndathina wandiga matawaaini?

    Ngirikia ngukuira atiriri,njigua ni iri matu
    Ona ndindikwo ni iri maguru
    Riu tondu ngari na nyumba ciakwa ni warega ri
    Nguria ati ri,kai aronekire wa kugura ndege
    Uthiagire iguru tutigakuonage

    Bururi ni uhiuhirie itugi twarigwo kana niguthii
    Kana ni gucoka
    Rika na nyumba itiumanagwo no cia mahinda maya ni irigithirie
    Ngai wa Kirinyaga ni aharuruke na ndagatumane

    • Kareithi

      ririkana Joshua,

      “Ndaregete Motoka, ona Nyumba kirorerwa ndigitūma ndithūe
      no wendo ti ido, utonga ni kirūrū!
      wendo ti rīītwa, gutirī rīītwa ritakuragia mwana!
      kana mbarī na ikeno cia mūcukani
      wendo ndaregete
      no ūyū wa mwīgano reke ūreme!”


Post a new comment

%d bloggers like this: